門常開：習總聖訓字字珠璣 為蝗禍解畫

門常開：習總聖訓字字珠璣　為蝗禍解畫

http://www.sharpdaily.hk/article/news/20121116/153316

喺接近14億人民冇反對等於支持嘅情況下，習近平榮升中共中央總書記。習總當選後見記者，雖然冇特別提到香港事務，不過吳爽可能神經過敏，硬係覺得佢老人家講話有弦外之音，尤其係以下一段： 
「我們的人民熱愛生活，期盼有更好的教育、更穩定的工作、更滿意的收入、更可靠的社會保障、更高水平的醫療衞生服務、更舒適的居住條件、更優美的環境，期盼着孩子們能成長得更好、工作得更好、生活得更好」。只要將呢段聖訓分拆開來演繹，就會明白習總其實係為近年香港網民口中嘅「蝗禍」辯護。

吳爽

我們的人民熱愛生活

熱愛生活嘅人，先會凡事率性而行隨心隨意，先會抓緊每分每秒做緊要事，包括喺商場、街邊、鐵路便溺，喺地鐵食麵、瞓覺。

期盼有更好的教育

所以香港年年都有咁多跨區學童，不辭跋涉橫渡深圳河，爭奪珍貴嘅北區學位。

更穩定的工作、更滿意的收入

梁振英收到冇？內地嘅勞苦大眾日以繼夜逼爆上水為咗乜？唔好再為難同胞喇。

更可靠的社會保障、更高水平的醫療衞生服務

呢啲嘢喺內地係冇可能出現嘅，唔係點會年年咁多內地孕婦冒死闖關、衝急症室？咁多雙非童爭住攞香港出世紙？

更舒適的居住條件

鬍鬚曾唔好再趕絕內地買家喇，人哋無非都係渴望一個美好家園啫，使唔使又SSD又BSD呀？

更優美的環境

人家千里迢迢來到購物天堂消費，梗係想住好啲喇，貝澳水清沙幼海天一色，唔住貝澳唔通住工廈劏房咩？